Listamenn

Jólapokagluggasýning

Jólapokagluggasýning

17. desember 2009 - 6. janúar 2009
JólapokagluggasýningJólapokagluggasýningin er í anddyri safnsins og sett upp  í tengslum við Jól í bæ, sem er jóladagatal Hveragerðisbæjar. Hugleiðing um hin ýmsu tákn sem tengjast jólum og mynd af hverju tákni útdeilt um allan bæ. Tákn og texti eru unnin af Guðrúnu Tryggvadóttur myndlistarmanni.  Tákninu sem útdeilt var til Listasafnsins var jólapoki.

Listasafn Árnesinga fékk 20 listamenn til þess að vinna með hvíta bréfpoka sem nú eru til sýnis í anddyri safnsins og eru aðgengilegir til skoðunar í gegnum gluggana allan sólarhringinn. Pokarnir eru meðhöndlaðir á afar fjölbreyttan hátt og á sýningunni má sjá hina heilögu þrenningu, ofgnóttarpoka, kartöflupoka, snjóbolta, útskurðarpoka með meiru, fæðinguna, verkefnalista, hreindýrahjörð, stjörnur, jólatré, jólakúlur og jólapoka, jólasveina á grein, móður jörð, móður og barn, byltingarsinna, ljósritunarpoka, brjóstsykurspoka, pokadýr, íslenska fánann, hangikjötslæri og friðardúfuna.

Listamennirnir sem verk eiga á sýningunni eru  Alda Sigurðardóttir, Borghildur Óskarsdóttir, Brynhildur Þorgeirsdóttir, Eygló Harðardóttir, Guðrún Gunnarsdóttir, Guðrún Kristjánsdóttir, Guðrún Tryggvadóttir, Hannes Lárusson, Haraldur Jónsson, Helgi Þorgils Friðjónsson, Hildur Bjarnadóttir, Hildur Hákonardóttir, Húbert Nói, Ingirafn Steinarsson, Ingvar Högni Ragnarsson, Karen Ósk Sigurðardóttir, Margrét Zophoníasdóttir, Steinunn Helgadóttir, Þórdís Sigurðardóttir og Þuríður Sigurðardóttir.

Dagskrá nóvember og desember

Dagskrá í nóvember og desember

Sunnudagur 15. nóvember
KL.15    Sýningarspjall á sunnudegi
Sunneva Hafsteinsdóttir framkvæmdastjóri HANDVERKS og HÖNNUNAR ræðir við gesti um sýninguna EINU SINNI ER, sem nú stendur í Listasafni Árnesinga.

Sunnudagur 22. nóvember
Kl. 14:00          Þráður eða lína - listasmiðja í teiknun
Guðrún Tryggvadóttir myndlistarmaður miðlar grundvallaratriðum teiknunar. Efni á staðnum endurgjaldslaust til afnota. Tilvalið fyrir fjölskyldur og vini að eiga góða stund saman.
Kl. 15:00         Sýningarspjall á sunnudegi
Hildur Hákonardóttir ræðir við gesti um sýninguna ÞRÆDDIR ÞRÆÐIR og skapar umræður meðal þeirra um verkin og markmið sýningarinnar, en Hildur er höfundur nokkra verka á sýningunni.

Sunnudagur 29. nóvember
Kl. 15:00    Erindi Á röltinu með Ragnari í Smára - Samstarfsverkefni með menningarferðinni Á röltinu með Ragnari í Smára og Byggðasafni Árnesinga - nánari upplýsingar síðar.

þriðjudagur 1. desember
kl. 20:00    Bókmenntakvöld á Listasafni
Gyrðir Elíasson, Bragi Ólafsson, Jón Kalman Stefánsson og Oddný Eir Ævarsdóttir lesa úr verkum sínum. Fiðlutónar. Þetta er samstarfsverkefni með Bókasafni Hveragerðis.

Sunnudagur 6. desember
    Jólastemning í Listasafninu
    Sýningarlok - ÞRÆDDIR ÞRÆÐIR og EINU SINNI ER
Kl. 15-16    Listamannaspjall.  Listakonurnar sem eiga verk á sýningunni ÞRÆDDIR ÞRÆÐIR verða á staðnum og ræða við gesti um verk sín og nokkrir höfundar verka á sýningunni EINU SINNI ER verða einnig til staðar.
Kl. 16:30     Gítartónar. Hörður Friðþjófsson skapar stemningu með því að leika nokkur ljúf jólalög á gítarinn.
    Piparkökur og heitt súkkulaði í kaffistofunni.

 

Safnahelgi á Suðurlandi

Safnahelgi á Suðurlandi 6. - 9. nóv.

Söfn um allt Suðurland og í Vestmannaeyjum bjóða upp á fjölbreytta menningardagskrá helgina 5. – 8. nóvember 2009. Yfirskrift dagskrárinnar verður Safnahelgi á Suðurlandi með undirtitilinum Matur og menning úr héraði því auk hins sögulega og menningarlega hluta dagskrárinnar verður minnt á gamlar og nýjar hefðir í matargerðarlist í héraðinu. Það eru Samtök safna á Suðurlandi og Matarkista Suðurlands sem standa að dagskránni með hátt í eitt hundrað aðilum. Verkefnið nýtur stuðnings Menningarráðs Suðurlands. Hugmyndin að baki Safnahelgi á Suðurlandi er að þjappa þeim fjölmörgu aðilum sem vinna við sunnlenska menningu saman um eina sameiginlega viðburðahelgi og bjóða íbúum héraðsins og gestum að njóta þess fjölbreytta menningarstarfs sem er í boði. Á veitingastöðum verður boðið upp á það besta í sunnlenskri matarhefð. Boðið er upp á dagskrá frá fimmtudegi til sunnudags, en staðirnir eru þó með mismunandi opnunartíma. Safnahelgin verður formlega opnuð í tengslum við málþing sem haldið verður í tilefni 60 ára afmælis Byggðasafnsins í Skógum fimmtudaginn 5. nóvember. www.sofnasudurlandi.is

Dagskráin í Listasafni Árnesinga

Föstudagur 6. nóv. til sunnudags 8. nóv.
Kl. 12:00-18:00 ÞRÆDDIR ÞRÆÐIR og EINU SINNI ER
Tvær sýningar sem kallast á þar sem handverk er í öndvegi, annars vegar í listum og hins vegar í hönnun nytjahluta, en umræður um mörk lista og hönnunar hafa lengi verið ofarlega á baugi.
Nánar um ÞRÆDDA ÞRÆÐI - hér
Nánar um EINU SINNI ER - hér

Þráður eða lína - listasmiðja í teiknun

Laugard.  8. nóv. kl. 15
Hvað er líkt með þráð og línu? Gestum boðið að æfa sig í teiknun - tilvalið fyrir fjölskylduna til að hafa gaman af. Guðrún Tryggvadóttir myndlistarmaður með meiru leiðbeinir gestum. Efni á staðnum endurgjaldslaust til afnota.

Sýningarspjall á sunnudegi

Sunnud. 9. nóv. kl. 15
Inga Jónsdóttir safnstjóri ræðir við gesti um sýningarnar og skapar umræður um verkin og markmið sýninganna.

Græna Íslandskortið, Ísland og heimurinn í grænu ljósi

Laug. og  sunnud. 8. og 9. nóv. kl. 14-15
Kynnt verður vefútgáfa „Græna Íslandskortsins" en jafnframt verða til sýnis græn kort sem þróuð hafa verið víða um heim. Tilgangur grænkortagerðar er að gera vistvæna kosti á sviði menningar, ferðaþjónustu og viðskipta um allan heim sýnilegri og aðgengilegri. Grænt Íslandskort/Green Map Iceland er samvinnuverkefni Náttúran.is, fyrirtækis sem starfrækt er í Hveragerði, Land- og ferðamálafræðistofu Háskóla Íslands og alþjóðlega verkefnisins Green Map System. Frekari upplýsingar á www.natturan.is

Heitir þræðir í Hveragerði

Menningarganga

HEITIR ÞRÆÐIR Í HVERAGERÐI

Sunnudaginn 18. október kl. 13


Bókasafnið í Hveragerði og Listasafn Árnesinga efna til menningargöngu um Hveragerði undir yfirskriftinni HEITIR ÞRÆÐIR Í HVERAGERÐI.

Gangan hefst við Hverasvæðið, í gestamóttökunni, kl. 13 og lýkur í Listasafni Árnesinga með spjalli um yfirstandandi sýningar ÞRÆDDIR ÞRÆÐIR og EINU SINNI ER.

Á fyrrnefnri sýningunni eru verk eftir veflistakonurnar Ásgerði Búadóttur, Hildi Hákonardóttur, Guðrúnu Gunnarsdóttur og Hildi Bjarnadóttur. Þar er þráðurinn skoðaður sem vettvangur átaka og er birtingarmynd þráðarins ólík hjá þessum fjórum kynslóðum. Síðarnefnda sýningin kemur frá HANDVERKI OG HÖNNUN. Hugmyndin að henni var að hvetja til nýsköpunar og vöruþróunar með því að stefna saman tveimur ólíkum listamönnum. Þema sýningarinnar er „gamalt og nýtt“ og á sýningunni má sjá fjölda nýrra og áhugaverðra nytjahluta sem unnir eru af þessum tólf pörum.

Í göngunni um Hveragerði voru fjórir staðir valdir sem útgangspunktar og munu yngri kynslóðir rekja þráð sögunnar með ýmsum flækjum til dagsins í dag. Á Hverasvæðinu mun Soffía Valdimarsdóttir, þjóðfræðinemi, fjalla um ímynd svæðisins. Varmahlíðarhúsið er næsti viðkomustaður og þar mun Jóhanna Hjartardóttir, menningar- og frístundafulltrúi í Hveragerði, segja frá. Við Reykjafoss í Varmá mun Njörður Sigurðsson, sagnfræðingur, m.a. rekja sögu ullarþvotta. Í Fagrahvammi mun Helga Sigurðardóttir, garðyrkjubóndi, segja frá þessari elstu gróðarstöð bæjarins.

Hlíf Arndal og Inga Jónsdóttir leiða gönguna og sýningarspjallið. Verkefnið er styrkt af Menningarráði Suðurlands.

Sýningarlok og sýningarspjall

Sýningarlok og sýningarspjall


ANDANS KONUR
Gerður Helgadóttir - Nína Tryggvadóttir
París - Skálholt
 
lýkur sunnudaginn 27. september og þann dag kl. 15 mun Inga Jónsdóttir safnstjóri bjóða upp á leiðsögn og ræða við gesti um sýninguna.

Fjölmargir hafa notið sýningarinnar og hún hefur hlotið mikið lof gesta enda er þar að sjá verk tveggja sterkra kvenna í íslenskri myndlist sett saman og snertifletir verka þeirra athugaðir. Útgangspunktur sýningarinnar eru verk þeirra Gerðar og Nínu  í Skálholtskirkju og í undirbúningi að sýningunni uppgötvaði Ásdís Ólafsdóttir, sýningarstjóri að til eru fjöldi formynda að altaristöflu Nínu sem sýna áhugaverða hugmyndaþróun og eru þau verk nú til sýnis í fyrsta sinn.

Annar snertiflötur Gerðar og Nínu er París á sjötta áratugnum og sjá má hvernig verk þeirra frá þeim tíma kallast á, en einnig eru verk sem tengjast andlegri leit og þroska sett saman í rými. Í safninu er líka til sýnis verkið Leikur ljóss og lita, sem er myndasýning Salbjargar Ritu Jónsdóttur. Það fangar hið magnaða andrúmsloft sem ljós og litir glugganna og mósaíkverksins skapa í Skálholtskirkju.
 
Sjá nánar um sýninguna hér.


LÁ - KEMUR Á ÓVART

eyrarrosin islensku safnaverdlaunin 2018 La

Notaleg kaffistofa
Setkrókur og upplýsingarrit um myndlist
Verið velkomin!

OPNUNARTÍMI: 12 - 18

Sumar:
alla daga 1. maí - 30. september

Vetur:
fim - sun 1. okt - 30. apríl
lokað 12. des 2016 - 12. jan 2017

Austurmörk 21 - 810 Hveragerði
listasafn@listasafnarnesinga.is
Sími 483 1727
Kort


Strætó leið 51stansar við Listasafnið

vidurkennt safn