Listamenn

Ólafur Gíslason ræðir við gesti um hliðstæður og andstæður sýninganna tveggja.

Ólafur Gíslason ræðir við gesti um hliðstæður og andstæður sýninganna tveggja.
í Listasafni Árnesinga Laugardaginn 15. febrúar kl. 15

Ólafur Gíslason er listfræðingur, kennari, fararstjóri og rithöfundur og hefur einnig starfað sem listgagnrýnandi. Hann mun fjalla um þær stóru spurningar sem verk beggja sýninganna ná að vekja um stöðu listarinnar, tækninnar og siðmenninguna í samfélaginu.

Undir yfirheitinu Hliðstæður og andstæður, kallast sýningarnar Rósa Gísladóttir – skúlptúr og Samstíga – abstraktlist á bæði í tíma og rúmi. Í verkunum birtist flatarmálsfræðin, samhverfan og listsögulegar hugmyndir bæði hliðstæðar og andstæðar í inntaki og formi. Það gefur tilefni til umræðu sem m.a. endurspeglar samfélagslega stöðu lista á mismunandi tímum og hvernig hún er samofin pólitískum væringum, spennu, tækniframförum og heimspekilegum pælingum.

Verk Rósu hafa sterka tilvísun í klassíska hefð um leið og þau eru nútímaleg og vísa líka í hversdagsleikann. Á sýningunni í Listasafni Árnesinga eru þau sett upp eins og tvær kyrralífsmyndir af ólíkri stærðargráðu. Sú minni sem er frá árinu 1999 endurspeglar kyrralífsmálverk en í stóra salnum hefur nýjustu verkum Rósu verið stillt upp á sama hátt en þar eru stærðarhlutföllin slík að það er sem gesturinn gangi inn í verkið. Þessa stóru skúlptúra vann Rósa fyrir sýningu á hinu virta safni, Mercati di Traiano, í rústum Keisaratorganna í Róm sumarið 2012.

Sýningin Samstíga-abstraktlist, sem er samstarfsverkefni með Listasafni Íslands og Listasafni Hornafjarðar, veitir innsýn í þróun abstraktlistar í víðu samhengi. Sjónum er sérstaklega beint að geómetrískri abstraktlist sem var fyrirferðamikil hér á landi um miðbik 20. aldar. Þá náðu Íslendingar eftirtekt annarra þjóða og voru samstíga öðrum listamönnum í Evrópu. Heiti sýningarinnar vísar líka í þá samþættingu listgreina sem stefnan boðaði þó að nafnið sé ef til vill í andstöðu við þá ólgu sem fylgir rótttækum breytingum.

Listasafn Árnesinga býður gesti velkomna til þessarar samræðu þar sem Ólafur mun glæða hversdagslegar vangaveltur heimspekilegu ívafi. Hann þekkir vel þau minni sem verk beggja sýninganna geyma. Ólafur var einn af SÚMurunum, samstarfs og sýningarvettvangi listamanna, sem kynntu nýjar leiðir í listsköpun upp úr 1965, sumpart sem andsvar við abstraktlistinni sem ríkt hafði áður. Hann hefur líka fylgst með listsköpun Rósu í nokkurn tíma og sem fararstjórií Grikklandi og á Ítalíu þekkir hann vel hinn klassíska heim Forn-Grikkja og Rómverja sem verk hennar vísa til.

LÁ - KEMUR Á ÓVART

eyrarrosin
Notaleg kaffistofa
Setkrókur og upplýsingarrit um myndlist
Verið velkomin!

OPNUNARTÍMI: 12 - 18

Sumar:
alla daga 1. maí - 30. september

Vetur:
fim - sun 1. okt - 30. apríl
lokað 12. des 2016 - 12. jan 2017

Austurmörk 21 - 810 Hveragerði
listasafn@listasafnarnesinga.is
Sími 483 1727
Kort


Strætó leið 51stansar við Listasafnið

vidurkennt safn