Listamenn

Gullkistan 20 ára

Gullkistan: 20 ára

Fyrir tuttugu árum efndu myndlistarmennirnir Alda Sigurðardóttir og Kristveig Halldórsdóttir, til listahátíðar á Laugarvatni þar sem þær voru þá búsettar. Yfir 130 listamenn tóku þátt í þeirri hátíð og þegar þær efndu aftur til hátíðar tíu árum síðar voru listamennirnir að minnsta kosti 145. Út frá þessum hátíðum kviknaði hugmyndin að dvalarstað fyrir skapandi fólk. Þeirri hugmynd hrundu þær líka í framkvæmd og til varð Gullkistan – miðstöð sköpunar, sem í dag hefur sitt aðal aðsetur í gömlu tjaldmiðstöðinni, en starfemin hefur náð til ýmissa staða á Laugarvatni.

Í tilefni þessara tímamóta er nú sett upp sýning í Listasafni Árnesinga á nýlegum verkum 24 listamanna sem tengst hafa Gullkistunni, ýmist sem þátttakendur í listahátíðunum eða dvalið í miðstöðinni. Verkin valdi Ben Valentine sem ráðinn var sem sýningarstjóri sýningarinnar og nálgunin er auga gestsins. Ben Valentine er sjálfstætt starfandi rithöfundur og sýningarstjóri sem kom hingað frá NY, en er nú að flytjast búferlum til Kambódíu þar sem hann mun stýra spennandi listamiðstöð. Á sýninguna hefur hann valið nýleg verk eftir níu íslenska listamenn og fimmtán erlenda þar sem sjá má áhrif frá Íslandsdvöl þeirra. Til hliðar við sýninguna verða aðgengilegar ýmsar heimildir um hátíðirnar tvær, miðstöðina og einnig er skapandi aðstaða fyrir gesti.

Sýningin, sem er samstarfsverkefni Listasafns Árnesinga og Gullkistunnar, er styrkt af uppbyggingarsjóði Suðurlands og mun standa til og með 20. september.

Sýningarstjóri / Curator

Ben Valentine  BNA /USA
benjaminvalentine.com

Ben Valentine (1989) er sjálfstætt starfandi rithöfundur og sýningarstjóri sem hefur rannsakað víða um heim með hvaða hætti tækni, list og stjórnmál fléttast saman Hann hefur meðal annars skrifað og starfað fyrir SXSW, Salon, SFAQ, Hyperallergic, VICE og The New Inquiry. Ben hefur verið sýningarstjóri nokkurra sýninga, þar á meðal World's First Tumblr Art Symposium í New York, Global Space fyrir Nútímalistasafnið í Indianapolis og Unmasking the Network fyrir A Simple Collective í San Francisco. Ben starfar nú í Kambodíu.

Ben Valentine, (1989) is an independent writer and curator exploring how technology, art, and politics intersect around the world. He has written and spoken for SXSW, Salon, SFAQ, Hyperallergic, VICE, and The New Inquiry to name a few. Valentine has curated several exhibitions, including the World's First Tumblr Art Symposium, in NYC; Global Space, for the Indianapolis Museum of Contemporary Art; and Unmasking the Network for A Simple Collective in San Francisco. Valentine currently lives in Cambodia.

_ _ _

Listamenn / Artists                  

Alda Sigurðardóttir  Ísland /Iceland          
aldasig.is

Alda Sigurðardóttir (1960) lærði tískuteikningu í París (1985) og lauk síðan námi frá fjöltæknideild Myndlista- og handíðaskóla Íslands árið 1993. Alda hefur sinnt margvíslegum störfum við hönnun og í leikhúsi, stjórnað viðburðum og rekið eigin fyrirtæki. Hún hefur tekið þátt í fjölda samsýninga og haldið nokkrar einkasýningar hér heima og erlendis. Alda rak ásamt öðrum alþjóðlega sýningarstaðinn GUK (1999-2006), hélt útisýninguna Ferjustað á Selfossi (2009) og er annar af tveimur stofnendum og stjórnendum Gullkistunnar. Alda hefur sinnt ýmsum félagsstörfum og setið m.a. í stjórnum Nýlistasafnsins og Sambands íslenskra myndlistarmanna.

Jasna Bogdanovska  BNA /USA                  
jasnabogdanovska.com 

Jasna Bogdanovska (1978) er ljósmyndari, kennari og forfallin ferðakona sem kannar ólíka menningarheima. Hún rannsakar málefni kvenna, menningar og trúarbragða, fortíðarþrá og það að tilheyra með því að nota ýmiss konar miðla á borð við ljósmyndun, innsetningu og vídeó. Hún sýnir verk sín víða um heim á einkasýningum og samsýningum. Hún er fastráðinn aðstoðarprófessor í ljósmyndun við Monroe Community College og forseti Félags ungra atvinnuljósmyndara sem kenna sig við Eastman og tilheyra samnefndu ljósmynda- og kvikmyndasafni Eastmans í Rochester í New York. Jasna fæddist og ólst upp í Makedóníu.

Linda Buckley  Írland / Ireland
lindabuckley.org                 

Linda Buckley (1979) er tónskáld sem býr í Dublin. Tónlist hennar hefur verið lýst sem „næmri“ (Gramophone) og sem „sérkennilegri og fallegri“ (Boston Globe) líkt og „tignarlegum jökli“ (RTÉ Ten) þar sem „spennandi safn verka markar henni sess í framvarðasveit yngri kynslóðar írskra tónskálda (Journal of Music). Verk hennar hafa verið flutt af symfóníuhljómsveit breska ríkisútvarpsins (BBC), symfóníuhljómsveit Dresden, Crash Ensemble, Fidelio Trio og á alþjóðlegum tónlistarhátíðum. Linda var „RTÉ lyric fm Composer in Residence“ frá 2011-13. Að loknu námi við UCC og Trinity College kennir hún nú við þann síðarnefnda í Dublin.

Alfredo De Stéfano  Mexíkó / Mexico
adestefano.com                  

Alfredo De Stéfano (1961) fæddist í Mexíkó í miðri eyðimörkinni. Hann hefur ástríðu fyrir landslagi, einkum eyðimörkinni sem hann hefur ferðast um ótal sinnum. Hann hefur haldið margar einkasýningar og samsýningar og verk hans hafa verið sýnd í fimm heimsálfum, þar á meðal París, Sao Paulo, New York, Washington, Madrid, Bogota og Buenos Aires. Hann hefur verið meðlimur í National System of Creators frá 2008.

Eygló Harðardóttir  Ísland/Iceland
eyglohardardottir.net 

Eygló Harðardóttir, (1964) lauk námi frá Myndlista- og handíðaskóla Íslands og framhaldsnámi frá AKI – Akademie voor Beeldende Kunst í Enschede Í Hollandi.  Árið 2014 lauk hún MA gráðu við listkennsludeild Listaháskóla Íslands með rannsóknarritgerðinni „Listaverk gefur vísbendingar um þrívíða nálgun í litanámi”.
Eygló hefur undanfarið fengist við samsett málverk sem oft eru óhlutbundnir skúlptúrar, staðbundin verk unnin inn í rými ásamt myndbandsverkum. Í verkum sínum skoðar hún mörk málverksins í samspili við rými og áhorfendur. Eygló hefur starfað og sýnt verk sín hér heima og erlendis og verk hennar eru í eigu opinberra safna.

Virginia Griswold  BNA / USA
virginiagriswold.com          

Virginia Griswold (1981) lauk meistaranámi frá myndhöggvara- og glerlistadeild Alfred-háskólans í NY árið 2011 og bakkalárgráðu frá Virginia Commonwealth háskólanum árið 2004. Árið 2009 fékk hún Arts Council Re-Grant styrk frá Brooklyn og árið 2011 var henni boðin námsdvöl í Cité Internationale des Arts í París á vegum Alfred-háskólans. Hún er nú aðstoðarprófessor við Austin Peay State háskólann í Tennessee.

Harpa Árnadóttir  Ísland / Iceland
harpaarnadottir.com

Harpa Árnadóttir (1965) er þekkt fyrir málverk sín, bæði þau sem hún kallar „sprungumálverk“ og þau sem hún gerir með vatnslitum. Hún stundaði myndlistarnám við Myndlista- og handíðaskóla Íslands, flutti síðan til Svíþjóðar og nam við Valand listaháskólann í Gautaborg. Verk Hörpu hafa verið sýnd víða og eru í eigu margra safna í Evrópu.  Þau voru valin til sýningar á fyrsta Gautaborgartvíæringnum, á Momentum og sjötta norræna tvíæringnum í samtímalist í Moss í Noregi.

Hjörtur Hjartarson  Ísland / Iceland
hjortur.org

Hjörtur Hjartarson (1961) lauk námi frá fjöltæknideild Myndlista- og handíðaskóla Íslands árið 1996 og stundaði nám í teiknideild Háskólans í Granada á Spáni 1996-1997. Hjörtur fæst við liti og form úr náttúrunni sem hann sækir yfirleitt  í lítinn dal í nágrenni Reykjavíkur sem hefur tengst honum frá unga aldri. Í dalnum ríkir mikil litadýrð vegna fjölbreytileika í gróðurfari, um hann rennur á og þar eru vötn og tjarnir. Á kyrrum dögum speglast umhverfið í vatnsfletinum og það glittir í botngróðurinn. Verk Hjartar eru reglulega til sýnis bæði hér á landi og erlendis.

Hlynur Hallsson  Ísland / Iceland
hallsson.de

Hlynur Hallsson (1968) býr og starfar í Hannover og á Akureyri. Hann stundaði nám við Myndlistaskólann á Akureyri, Myndlista- og handíðaskóla Íslands, FH Hannover, HfbK Hamburg og Kunstakademie Düsseldorf. Frá árinu 1999 hefur Hlynur kennt við Myndlistaskólann á Akureyri og Listaháskóla Íslands. Hlynur rannsakar hugtök eins og heimsvaldastefnu, landamæri þjóða og menningar í heimi hnattvæðingar og samskipti ólíkra menningarheima.

Erica Kremenak  BNA / USA
ekremenak.com

Erica Kremenak (1956) lauk bakkalárgráðu í fagurlistum frá Iowa háskólanum og nam skúlptúr og málaralist við San Francisco háskólann og San Francisco Art Institute. Hún býr nú í Oakland, Kaliforníu og vinnur ýmist við málverk, ljósmyndun eða hönnun.

Kristin Reynisdóttir  Ísland / Iceland
this.is/kristin

Kristín Reynisdóttir (1961) stundaði nám við Akademie der Bildenden Künste í Düsseldorf í Þýskalandi, Myndlista- og handíðaskóla Íslands og Pilchuck Glass School í Bandaríkjunum. Kristín hefur haldið einkasýningar á Íslandi, í Þýskalandi, Noregi og Finnlandi. Hún er meðlimur í Myndhöggvarafélaginu í Reykjavík, Sambandi íslenskra myndlistarmanna og Nýlistasafninu. Hún hefur hlotið nokkra styrki, þar á meðal frá mennta- og menningarmálaráðuneytinu, styrk fyrir skandinavíska listamenn auk þess að hljóta listamannalaun.

Kristveig Halldórsdóttir  Ísland / Iceland
kristveig.is

Kristveig Halldórsdóttir (1964) er annar af tveimur stofnendum og stjórnendum Gullkistunnar. Hún er jafnframt myndlistarmaður og kennari í Reykjavík. Hún lauk meistaranámi frá listaháskólanum í Osló árið 1998 með sérhæfingu í textílmyndlist og notkun handgerðs pappírs og plöntutrefja sem hún hélt áfram að nota eftir að hún sneri aftur til Íslands. Myndlist Kristveigar hefur smám saman þróast yfir í notkun annarra miðla og aðferða, einkum ljósmynda og tölvumyndvinnslu en með áframhaldandi tengingu við textíl.

Keiko Kurita  Japan
swimciel.net                        

Keiko Kurita ((1975) er japanskur ljósmyndari með meistaragráðu í myndlist og miðlun frá Goldsmiths í London. Verk hennar snúast um að raungera hugmyndina um  að það sé skáldskapur í sannleikanum ef maður trúir því. Hún hefur sýnt myndraðir um þetta þema á einkasýningum í Tokyo, Reykjavík og London.

Catherine Ludwig  Austurríki / Austria
nocti-luca.com                     

Catherine Ludwig (1976) starfar og býr í Vín. Hún er „transmedia“ listamaður sem fer  út fyrir mörk hefðbundinna hindrana ólíkra listmiðla. Catherine lagði stund á grafíska hönnun í Nürnberg í Þýskalandi og „transmedia“ list í Vín við  Universität für angewandte Kunst í Vín. Hún hefur dvalið á mörgum listavinnustofum og haldið sýningar í Taiwan, Þýskalandi, Austurríki, Ítalíu, Bandaríkjunum og Íslandi. Galerie Reintaler í Vín er umboðsgallerí Catherine Ludwig.

Joan Perlman BNA / USA
joanperlman.com               

Joan Perlman er búsett í Los Angeles. Hún hefur sýnt málverk sín og vídeóverk á ýmiss konar vettvangi í Bandaríkjunum og víðar. Þar á meðal má nefna Fringe Exhibitions í Los Angeles; Wave Hill í New York; Tufts University Arts Museum í Boston; Long Beach Museum of Art í  Kaliforníu og Hafnarborg í Reykjavík. Árið 2014 hlaut Joan styrk úr Amerísk-skandinavíska sjóðnum fyrir skapandi listir og Puffin-sjóðnum fyrir ljósmyndir.

Raom & Loba  Frakkland / France
raometloba.com 

Raom (1962) nam myndlýsingu við Escuela de Bellas Artes í Buenos Aires. Loba (1972) er grafískur hönnuður og nam við París VIII háskólann. Þau hafa unnið að gerð ljósmyndaraða frá árinu 1998 en hafa einnig gert teikningar, ætingar, skúlptúra og vídeóverk. Verk þeirra hafa verið sýnd víða um heim. Hver ljósmynd er brot af langri sögu og varpar ljósi á afmarkaðan hluta mannlegs eðlis með því að gera þann hluta  sýnilegan á táknrænan hátt.

Sara Björnsdóttir  Ísland / Iceland
sarabjornsdottir.com

Sara Björnsdóttir (1962) stundaði nám við Myndlista- og handíðaskóla Íslands og Chelsea College of Art and Design í London. Hún býr og starfar í Reykjavík. Margræð verk Söru endurspegla upplifun hennar á daglegu lífi þar sem hún notar gjörninga, ljósmyndir og vídeó en rannsakar einnig ytra umhverfi sitt af gaumgæfni. Um leið og hún afhjúpar sjálfa sig stöðugt í list sinni gefur hún okkur á hljóðlátan hátt leyfi til að horfast í augu við fegurð okkar jafnt sem mistök.

Soffía Sæmundsdóttir Ísland / Iceland
soffias.is

Soffía Sæmundsdóttir (1965) útskrifaðist úr grafíkdeild MHÍ 1991, lauk meistaragráðu í málun frá Mills College í Kaliforníu 2001-3 og kennsluréttindum frá LHÍ 2010. Hún hefur staðið fyrir ótal sýningum, tekið þátt í samsýningum, rekið vinnustofu og kennt myndlist um árabil. Hún hefur auk þess tekið þátt í félagsstörfum myndlistarmanna m.a. sem formaður og í sýningarnefnd félagsins Íslensk grafík. Verk hennar eru í eigu fjölmargra einstaklinga, fyrirtækja og stofnana. Hún hefur hlotið ýmsar viðurkenningar á alþjóðlegum sem innlendum vettvangi og verið valin til þátttöku á sýningum fyrir Íslands hönd.

Anika Steppe and Anne Carlin, USA
anikasteppe.com

Anika Steppe (1991) og Anne Carlin (1990) komu til Íslands veturinn 2014 og dvöldu á tveimur listavinnustofum. Meðan á dvölinni á Gullkistunni stóð unnu þær saman að stuttmynd sem ber heitið „Total Time“ (ísl. Frá upphafi til enda). Anika vinnur aðallega með ljósmyndir en Anne á sviði heimildamyndagerðar. Þær eru báðar búsettar í Brooklyn í New York.

Alex Strada, USA
alexandrastrada.com

Alex Strada (1998) er ljósmyndari búsett í New York. Verk hennar hafa verið sýnd í Bandaríkjunum, Þýskalandi, Belgíu, Mexíkó og á Íslandi, þar sem hún sótti ljósmyndanámskeið m.a. hjá Mary Ellen Mark. Alex hefur sagt að „ljósmyndun er mikilvægt tæki til þess að hægja á sér, líta í kringum sig og hugsa um tilveru okkar“. Hún stundar nú meistaranám við Columbia háskólann. 

Lilian Day Thorpe, USA
lilianday.com

Lilian Day Thorpe (1991) lauk BFA-prófi frá Pratt Institute í New York árið 2014 með láði. Ljósmyndir Thorpe eru stafræn samklipp gerð í myndvinnsluforriti en byggð á hennar eigin upprunalegu ljósmyndum. Útkoman er ímyndað landslag sem virðist meira í ætt við málverk en ljósmyndir. Hún leitast við að kalla fram sams konar áhrif „handmálunar“ í ljósmyndum sínum og ljósmyndarar í lok 19. aldar. Næstkomandi haust mun Thorpe hefja meistaranám í listasögu við Pratt Institute.

Gabrielle Vitollo, USA
gabriellevitollo.com

Gabrielle Vitollo (1989) lauk BFA-prófi frá Maryland Institute listaháskólanum árið 2012. Hún hefur dvalið á nokkrum listavinnustofum og hefur tvisvar hlotið styrk úr sjóði Elizabeth Greenshields. Hún hefur meðal annars haldið einkasýningar í Well Point í Philadelphia (2013), MICA Gateway Gallery í Baltimore (2011) og MADWAL Gallery í New York í Bandaríkjunum (2014). Hún mun hefja meistaranám við New York Steinhardt-háskólann haustið 2015.

LÁ - KEMUR Á ÓVART

eyrarrosin islensku safnaverdlaunin 2018 La

Notaleg kaffistofa
Setkrókur og upplýsingarrit um myndlist
Verið velkomin!

OPNUNARTÍMI: 12 - 18

Sumar:
alla daga 1. maí - 30. september

Vetur:
fim - sun 1. okt - 30. apríl
lokað 12. des 2016 - 12. jan 2017

Austurmörk 21 - 810 Hveragerði
listasafn@listasafnarnesinga.is
Sími 483 1727
Kort


Strætó leið 51stansar við Listasafnið

vidurkennt safn