Listamenn

Guðrún Gunnarsdóttir (1948)

Guðrún nam vefnað á verkstæði Kim Naver í Kaupmannahöfn 1972-75 og sótti 1987 námskeið við Haystack Mountain School of Art and Craft, Maine, Bandaríkjunum. Hún hefur unnið að frjálsri myndsköpun og textílhönnun frá árinu 1976. Guðrún hefur skapað sér ákveðna sérstöðu með efnisvali og er virk í sýningahaldi. Hún hefur haldið bæði einkasýningar og tekið þátt í fjölmörgum samsýningum hérlendis og erlendis. Hún hefur hlotið ýmsar viðurkenningar og hefur t.d. þrisvar verið tilnefnd til Menningarverðlauna DV og hlaut þau árið 1991. Guðrúnu hafa nokkrum sinnum verið veitt starfslaun listamanna og hefur hún hlotið styrki m.a. frá The Scandinavia – Japan Sasakawa Foundation.

Verk hennar er að finna í eigu safna hérlendis, s.s. Listasafns Íslands og erlendis, m.a. í Japan. Þau eru einnig í eigu ýmissa opinberra stofnana hér á landi og erlendis sem og í einkasöfnum.

Nánari upplýsingar er að finna á heimasíðu hennar www.internet.is/gudgunn

Auður Hildur Hákonardóttir (1938)

Hildur lauk námi við Myndlista- og handíðaskóla Íslands sem myndvefari árið 1968 og hélt þá til framhaldsnáms við listaháskólann í Edinborg. Árið 1980 bætti hún síðan við sig réttindum sem vefnaðarkennari frá Myndlista- og handíðaskólanum eftir að hafa kennt þar á árunum 1969–81. Þar af var hún skólastjóri hans 1975–78 á miklum umbrotatímum í sögu skólans.  Hildur starfaði jafnframt að listvefnaði á árunum 1969 – 90 og hélt þrjár einkasýningar auk þess að taka þátt í fjölda samsýninga hér á landi og erlendis. Hún var virk í SÚM-hópnum og kvennabaráttunni sem endurspeglast í verkum hennar. Verk eftir Hildi eru í eigu Listasafns Íslands, Nýlistasafnsins, Listasafns Árnesinga og fleiri opinberra stofnana sem og í einkasöfnum.

Hildur hefur gegnt ýmsum trúnaðarstörfum, s.s. setið í stjórn Textílfélagsins, í Listahátíðarnefnd og í stjórn Listskreytingasjóðs. Hún var forstöðumaður Byggða- og listasafns Árnesinga á Selfossi 1986-93 og safnstjóri Listasafns Árnesinga 1998-2000. Síðustu ár er Hildur einkum þekkt fyrir ræktun og ritstörf.

Ásgerður Búadóttir (1920)

Ásgerður lauk námi frá Myndlista- og handíðaskóla Íslands 1946 og hélt þá til Kaupmannahafnar og nam við Konunglega listaháskólann 1946-49, í málaradeild hjá Vilhelm Lundstrøm. Ásgerður er sjálfmenntuð í veflistinni en nýtir sér vel myndlistarnámið í nýjum miðli og er frumkvöðull nútíma veflistar hér á landi. Hún vann til gullverðlauna á alþjóðlegri list- og handverkssýningu í München fyrir vefnað árið 1956 og hefur síðan hlotið fjölmargar viðurkenningar innanlands og utan, m.a. menningarverðlaun DV 1982. Hún var borgarlistamaður Reykjavíkur 1983-84 og síðastliðin ár hefur hún notið heiðurslauna listamanna frá Alþingi. Efnt hefur verið til a.m.k. 10 einkasýninga á verkum Ásgerðar en einnig hefur hún tekið þátt í miklum fjölda samsýninga bæði hérlendis og erlendis, oft sem fulltrúi íslenskrar myndlistar á alþjóðlegum sýningum. Verk hennar er að finna í ýmsum opinberum byggingum og á helstu listasöfnum landsins, s.s. Listasafni Íslands, einnig í samsvarandi stofnunum erlendis og í einkasöfnum. Fjallað hefur verið um list hennar í ýmsum ritum og a.m.k. tvívegis hefur verið unnið sjónvarpsefni um list hennar.

LÁ - KEMUR Á ÓVART

eyrarrosin islensku safnaverdlaunin 2018 La

Notaleg kaffistofa
Setkrókur og upplýsingarrit um myndlist
Verið velkomin!

OPNUNARTÍMI: 12 - 18

Sumar:
alla daga 1. maí - 30. september

Vetur:
fim - sun 1. okt - 30. apríl
lokað 12. des 2016 - 12. jan 2017

Austurmörk 21 - 810 Hveragerði
listasafn@listasafnarnesinga.is
Sími 483 1727
Kort


Strætó leið 51stansar við Listasafnið

vidurkennt safn